Ad Anna

MANNAGGIA  A  TTE

Mannaggia a tte

e ‘o juorno ca si nnata!

Mme fosse rutto ‘na coscia

o pure ‘na spalla

quanno passaje abbascio ‘e Viterane

e te vedette for”o balcunciello…

Stive arracquanno ‘e ppiante cu ‘e ggeranie…

Cu ‘o buttiglione mmano t’acalave

e te susive...e ancora t’acalave…

‘A sotto i’ te guardavo miezo muorto;

pe’ poco nun murevo cu ll’infarto…

‘A chillu juorno quante me n’hê fatte!

Nun pozzo fa l’elenco, chesto ‘o ssaje,

pecché ‘sta lista nun fernesce maje…

Ma nun scetammo ‘e muorte, Carulì…

Però quanno te tengo ‘int’a ‘sti bbraccia

me scordo ‘e tutt”e ppene e ‘arraggia ‘e sempe…

È proprio overo...senza ‘e te nun campo…

Mannaggia a tte…